السلام عليكم
أنا خلاص زهقت من الموقع الكئيب ده
انا لما بيبقى عندي موضوع جاهز وعايز احطه هنا باقعد تلت ساعة على الاقل عشان بس انسق الموضوع
موقع تابني اوي
فقلت أعزّل من هنا
تابعوني على المدونة الجديدة
http://osamasherif.blogspot.com/
جزاكم الله خيرا على حسن متابعتكم
والسلام عليكم
السلام عليكم
لفت نظري أكثر من مرة إن فيه ناس كتير عندهم خلط شديد
خلط بين السلفيين والسعوديين
أو بمعنى أصح خلط بين السلفية والحكومة السعودية
يعني . .
بما أن السعودية بتسمح بانتشار قواعد أمريكية على أراضيها للدفاع عنها ضد حد معين
أو بتسمح لهم بإعمارها واستهلاك بترولها حتى أصبح اقتصاد أمريكا مسيطر على اقتصادها
زي غيرها من الدول العربية
فظهرت نظرية جديدة أنا أسميها نظرية التمويل الخارجي
نظرية بتسبب لبعض المسلمين نفور من دينهم
ده غير مرض “الإسلاموفوبيا” يعني الخوف من الإسلام اللى للأسف مسيطر على بعض
المسلمين
فيه ناس معتقدة إن فيه تمويل بييجي من بره
التمويل ده وصل حتى لعلماء وشيوخ السعودية
بل وامتد أيضا لخارج الحدود السعودية بحجة نشر الفكر “الوهابي” كما يسمونه
وذكرنا مرارا إن فيه فرق كبير بين السلفية والحكومة السعودية
السلفية ليست حكومة ولا جماعة ولا تقتصر على أفراد معينين
السلفية باختصار هو العودة لأصل الدين حنيفا بلا تغيير او تمييع او تشدد او بدع
اما الحكومة السعودية فهي حكومة كأي حكومة
تصيب وتخطئ
لكنها غالبا تتخذ السلفية مصدرا لتشريعاتها
بس فيه ناس للأسف متخيلة إن فيه رجل أمريكي لابس قبعة مخططة أحمر في أبيض وفيها خط
أزرق عليه نجوم داوود
وبيتقابل مع شيخ بلحية ومستن بسنة النبي صلى الله عليه وسلم
فيقول الأمريكي: ايه يا شيك
( هو قصده “ايه يا شيخ” بس مش بيعرف ينطق حرف الخاء )
عايزين نزود مرتبك شوية
بشرط تعمل اللى هقول لك عليه ده- عايزك تبقى متشدد على طول
- وكل حاجة حرام حرام حرام، حرّم على الناس عيشتهم
- عايزك تضحك على عقول الشباب
- عايزك تكرّه الناس في الشيعة
- وفي نفس الوقت عايزين السنيما المصرية تبقى عاملة زي السنيما الإيرانية
( لاحظوا التناقض المضحك )
- عايزك تبقى متحكم فى الرقابة على السنيما المصرية
- ولو ما قدرتوش ادفع آلاف الجنيهات رشاوي للممثلات عشان يتحجبوا
( ماهو كون إن ممثلة تتحجب فده دليل على إن فيه مؤامرة في نظرهم السطحي)
- عايزك تعمل فتنة طائفية بين المسلمين والمسيحيين
- عايزك . . وعايزك . . وعايزك
فالشيخ يقول له: انت تؤمر يا بوب فيضحك الأمريكي ضحكة شيطانية مصاحبة لصدى صوت حتى يختفي
فيه فعلا ناس متخيلة إن فيه تمويل خارجي بيتحكم في الشيوخ والدعاة
والأعجب من كده إن كلام أصحاب نظرية التمويل الخارجي متناقض جدا جدا زي ما شفتوا
والأغرب من كده إن مافيش أي دليل على كلامهم، إن يتبعون إلا الظن وما تهوى الأنفس
فكر مضحك
ونظرية تدعوا للسخرية
نظرية التمويل الخارجي
والسلام عليكم
السلام عليكم
حد فكر قبل كده اسم “مصر” أو “Egypt” ده جه منين؟
هو أنا لاقيت مصدر كلمة “Egypt” فقلت أنقل لكم المعلومة اللذيذة دى
مصر زمان أيام الفراعنة كان ليها كذا اسم
من أشهر الأسماء دي كان “كمت” يعنى الأرض السوداء
وكان في أسماء تانية تعني الضفتين والأرضين وحاجات كده
أحد الأسماء دى كان جاي من اسم معبد شهير في مصر آنذاك
المعبد كان اسمه “حت كا بتاح” يعنى بيت قرائن بتاح
بتاح ده كانوا بيعتبروه من أهم الآلهة عندهم حتى إنه كان المعبود الرئيسي في الدولة
القديمة
المهم اليونانيون أو الإغريق يعني لما جم مصر ماكانوش بيعرفوا ينطقوا حرف الحاء
والظاهر إنهم كانوا بيقلبوها ياء
فبقى الاسم “اي جو بتيس” مع مراعاة إن الإغريق كانوا دايما بيضيفوا حرف السين في
الآخر على بعض الكلمات زي رمسيس وأوزوريس وسيرابيس، بس أنا مش عارف بصراحة إيه
السبب لحد دلوقتي
من أول إيجوبتيس ابتدى التحريف ياخذ طريقين
الطريق الأول بتاع الرومان ومن بعدهم الأوروبيون بصفة عامة
فبقى الاسم “إيجبت” واللي اتحرف بعد كده للأسماء اللي نعرفها دلوقتى
بالانجليزي Egypt
بالفرنساوي Egypte
بالاسباني Egipto
بالالماني Agypten
وهكذا
أما الطريق التاني فهو طريق العرب
الكلمة بقت “ايقوبطي” أو “قبطي” لحد بقى العرب يقولوا على مصر: القبط
والمصري يقولوا عليه قبطي
ارتبط في أذهاننا إن كلمة قبطي تساوي كلمة مسيحي أو نصراني
وده عشان المسلمين لما فتحوا مصر كان الأقباط (المصريون يعني) ينتسبون إلى المسيحية
لكن من الواضح إن كلمة قبطي تعني مصري بصرف النظر عن دين ذلك المصري
يعني ما تتخضوش لما تلاقوني بأقول على نفسي إني قبطي، مصري يعني
بس طبعا مش المفروض إن الواحد يقول على نفسه كده
لأن مش كل الناس تعرف المعلومة دي فممكن الواحد يلتبس عليه الأمر ومايفهمش صح
ملحوظة: مش عايزين بقى واحد مسيحي يجي يتنفخ ويقول: أنا قبطي واحنا الأصل ودي بلدنا
أصلا
لا ياعم احنا (في مصر) أقباط مسلمين
غير كده بقى ورد أحيانا اسم “مجر” بتعطيش الجيم و”مشر” و”مصر” وحاجات كده اللى
بنقول عليها دلوقتى مصر
ده غير ان كلمة مصر في اللغة العربية تعنى القـُطر
بس كده ده اللى أعرفه
والسلام عليكم
السلام عليكم
طب وبعدين؟
أنا هفضل كده لحد امتى؟
أنا زعلان من نفسي جدا
نفسي أعمل حاجة بقى تكون خالصة لوجه الله
لوجه الله وبس
مش لحاجة تانية
يعني أنا باعمل كذا وكذا، عشان يقولوا عليّ كذا وكذا
وباعمل كمان كذا وكذا، عشان يقولوا عليّ كذا وكذا
وبعمل مجهود في كذا وكذا، عشان يقولوا عليّ كذا وكذا
وباستحمل كذا وكذا، عشان يقولوا عليّ كذا وكذا
وباجي على نفسي في كذا وكذا، عشان يقولوا عليّ كذا وكذا
وباعمل نفسي محترم في مواقف معينة، عشان يقولوا عليّ كذا وكذا
وباقول كذا وباكتب كذا، عشان يقولوا عليّ كذا وكذا
طب وبعدين؟
يعني ينفع كده؟
ألاقي الكلمة المرعبة دي واقفة قدامي
” وقد قيل “
عن أبي هريرة رضي الله عنه، أن رسول الله صلى الله عليه وسلم
قال:
إن الله تعالى إذا كان يوم القيامة ينزل إلى العباد ليقضي بينهم ، وكل أمة جاثية ،
فأول من يدعو به رجل جمع القرآن ، ورجل قتل في سبيل الله ، ورجل كثير المال ، فيقول
الله للقارئ : ألم أعلمك ما أنزلت على رسولي ؟ قال : بلى يا رب . قال : فماذا عملت
فيما علمت ؟ قال : كنت أقوم به آناء الليل وآناء النهار ، فيقول الله له : كذبت ،
وتقول الملائكة : كذبت ، ويقول الله له : بل أردت أن يقال : فلان قارئ ، فقد قيل
ذلك . ويؤتى بصاحب المال ، فيقول الله : ألم أوسع عليك حتى لم أدعك تحتاج إلى أحد ؟
قال : بلى يا رب . قال : فماذا عملت فيما آتيتك ؟ قال : كنت أصل الرحم وأتصدق ،
فيقول الله له : كذبت . وتقول الملائكة له : كذبت ، ويقول الله بل أردت أن يقال :
فلان جواد وقد قيل ذلك . ويؤتى بالذي قتل في سبيل الله فيقول الله له : فيماذا قتلت
؟ فيقول : أمرت بالجهاد في سبيلك فقاتلت حتى قتلت . فيقول الله له : كذبت ، وتقول
له الملائكة : كذبت ، ويقول الله : بل أردت أن يقال : فلان جرئ ، فقد قيل ذلك . ثم
ضرب رسول الله صلى الله عليه وسلم على ركبتي فقال : يا أبا هريرة : أولئك الثلاثة
أول خلق الله تسعر بهم النار يوم القيامة
صححه الألباني في صحيح الترمذي 2382
ساعتها مافيش حل إلا الدعاء
ويرفع من معنوياتي الحديث الجميل ده
قيل لرسول الله صلى الله عليه وسلم : أرأيت الرجل يعمل العمل
من الخير، ويحمده الناس عليه؟ قال: تلك عاجل بشرى المؤمن
رواه مسلم 2642
أرجوكم ادعوا لي
والسلام عليكم
السلام عليكم
بعض الناس سألوني ازاي نقدر نحدد الشرق والغرب من غير ما
نستخدم البوصلة؟
فيه كذا طريقة بس أنا قلت اكتب هنا شرح مبسط لأبسط طريقة
من وجهة نظري
بكل بساطة أثناء النهار من شروق الشمس لحد آذان الظهر الشمس بتبقى مايلة ناحية
الشرق
ومن آذان الظهر لحد آذان المغرب الشمس بتبقى مايلة ناحية الغربوأنت واقف، اتجاه ظلك بيبقى عكس اتجاه الشمس
يعنى من شروق الشمس لحد آذان الظهر ظلك بيبقى ناحية الغرب
ومن آذان الظهر لحد آذان المغرب ظلك بيبقى ناحية الشرق
أتمنى يكون الموضوع مفهوم
فيه بقى ملحوظة لو مافهمتهاش ماتشغلش بالك بيها كتير
هنا في مصر وفي القاهرة خصوصا الشمس عمرها ما بتبقى عمودية على الأرض
هي آخرها تبقى عمودية على مدار السرطان في جنوب مصر في فصل الصيفالمهم ان الظل دايما هتبقى في زاوية ميل بسيطة ناحية الشمال
فبالفهلوة كده ظبطها مع نفسك عشان تجيب الزوايا صح
http://www.ever-acc.com/images/meil_el_del.JPG
اتمنى تكونوا فهمتوا الحتة دى، ولو حد مافهمهاش مش مهم
المهم ان من شروق الشمس لحد آذان الظهر ظلك بيبقى ناحية الغرب
ومن آذان الظهر لحد آذان المغرب ظلك بيبقى ناحية الشرق
طيب لو احنا بالليل بقى نعمل ايه
نروح بقى للنجوم اللي ربنا جعلها سبب لهدايتنا في الظلام
وَهُوَ الَّذِي جَعَلَ لَكُمُ النُّجُومَ لِتَهْتَدُواْ بِهَا فِي ظُلُمَاتِ
الْبَرِّ وَالْبَحْرِ قَدْ فَصَّلْنَا الآيَاتِ لِقَوْمٍ يَعْلَمُونَ
سورة الأنعام 97
دلوقتى أتمنى إنكم تفهموا كلامى على طول ان شاء الله
واللى فيه حاجة واقفة قدامه يقول
الأرض بتلف حول محورها
ومحورها ده بيشاور على نجم سميناه نجم الشمال
هو من أكتر النجوم اللامعة فى السماء، لكن مش أكترها لمعانا
طيب نعرف نجم الشمال ازاى
دور على شكل معين من النجوم اسمه الدب الأكبر، ده عامل زى المغرفة كده بتاعت
الشوربة
وتعالى عند طرفها اللى مكون من نجمتين المسافة ما بينهم مثلا تساوي
x
وامشى على نفس خطهما مسافة
5x
تلاقى نجم الشمال وتلاقيه مشاور دايما على الشمال
خش هنا كمان
http://www.astropix.com/HTML/SHOW_DIG/038.HTM
بس مالكش دعوة بالمغرفة الصغيرة اللى نجم الشمال تبعها
طبعا النجوم دى من أكتر النجوم الواضحة
انت محتاج بس تبقى في مكان مافيهوش إضاءة اوى ويفضل مايكونش فيه مباني عشان
تقدر تشوف وتدور براحتك
وزى ما قلنا نجم الشمال ناحية الشمال على طول
طب بالمرة بقى ازاى نحدد القبلة في القاهرة مثلا
في الخريطة دي تلاقى ان الزاوية بين اى دائرة عرض (يعنى خط بين الشرق والغرب)
وبين الخط الواصل بين القاهرة ومكة 45 درجة بالضبط
إذن بعد ما تحدد الشرق والجنوب، بص فى الاتجاه اللى بينهم بالضبط، يعنى على الخط
بين الشرق والجنوب
والأمر فيه سعة إن شاء الله
قال رسول الله صلى الله عليه وسلم: ما بين المشرق و المغرب قبلة
صححه الألباني
ده لما كان المسلمين في المدينة ومكة جنوب المدينة فالقبلة بالنسبة لهم ناحية
الجنوب
وعشان الناس ماتتكلفش فوق طاقتها فى تحديد القبلة، النبي صلى الله عليه وسلم قال
لهم إن القبلة بين المشرق والمغرب على قد ما تقدر وخلاص مش لازم تجيب الدرجة
بالضبط
والله أعلم
أرجو إن الموضوع يكون مفيد بصفة عامة
وإن شاء الله فيه حاجات تانية ممكن نضيفها بإذن الله
والسلام عليكم
السلام عليكم
موضوع يخنق جدا
ومن المواضيع اللي شاغلة الرأي العام إلى حد ما
شنودة هداه الله وشوية من رجال النصرانية حواليه الظاهر إنهم ابتدوا يفسروا لنا
ديننا ويفتوا فتاوى كمان
والظاهر إننا كنا غافلين عن المعلومات الرهيبة اللى طلعوا بيها
النصراني اللى دخل الإسلام وبعدين رجع قال: لا أنا عايز أرجع
مسيحي تاني، ده عندنا وزارة الداخلية ماترضاش تطلع له بطاقة جديدة مكتوب فيها:
الديانة مسيحي
خير الحمد لله، مصر لسة بخير
لكن شنودة قال لنا: لا ازاى، انتوا مش واخدين بالكوا ولا ايه؟؟؟ ده انتوا
عندكم بتقولوا لا إكراه في الدين، وموضوع الردة واللي يرتد يتقتل والكلام ده مش
عندكم، ده ضد الإسلام
وطلع كام بني آدم كده من بتوع حقوق الإنسان يقولوا: ايه ده ايه ده !!! فين حرية
الاعتقاد؟؟؟
فأنا بصراحة الكلام ده بيستفزني
وأنا عايز أقول حاجة
هو مين قال إننا ضد حرية الاعتقاد؟
“وَقُلِ الْحَقُّ مِن رَّبِّكُمْ فَمَن شَاء فَلْيُؤْمِن وَمَن شَاء فَلْيَكْفُرْ”
الكهف 29
لو واحد هو أصلا يهودي أو نصراني من البداية فده له مطلق الحرية في اعتقاد ما يشاء
وممارسة طقوس دينه
لو هو أسلم وعايز بعد ما دخل الإسلام يكفر يبقى يكفر مع نفسه كده بينه وبين ربنا هو
يحاسبه ويعاقبه، مافيش مانع
لكن ييجي يعلن ويشهر ارتداده، نقول له: لا، اهدا كده واحترم نفسك وإلا نبتدي نطبق
عليك حد الردة
يعنى لو واحد قافل بابه عليه وعمال يمارس طقوس أي دين مع نفسه كده من غير ما حد
يعرف إنه ساب الإسلام، يبقى ده من حقه
وأنا كحاكم مسلم مش من حقي إني أتتبعه وأتجسس عليه عشان أشوف هو لسه مسلم ولا لأ
ومش من حقي إنه أتهمه بالكفر من غير دليل واضح وشروط كتير وضعها العلماء
مش هي دى حرية الاعتقاد اللى بيقولوا عليها؟ مش أنا كده يبقى عداني العيب؟
لكن غير كده أنا من حقي أحافظ على أطفال وشباب دولتي الإسلامية (لو أنا الحاكم
يعنى) من إن واحد زي ده يفتنهم في دينهم
طب ليه بقى موضوع حد الردة ده؟؟؟
ماهو اللى داخل الإسلام ده حاجة من اتنين
يا إما داخل عشان فعلا عايز يوصل للحق، وفي الحالة دي هو لازم يبقى عارف إن ديننا
ليه شروط، منها إنه مش مسموح له إنه يعلن إرتداده عن الإسلام أبدا، الدين ده مش
لعبة يدخل ويخرج زي ماهو عايز
ساعتها يبقى هو اللي دخل الإسلام بإرادته وموافق على الشروط دي
يا إما اللي داخل الإسلام ده داخل بيلعب، أو عايز يفتن المسلمين، عايز يخش (نفاقًا)ـ
ويخرج عشان يقول للناس: ده كنت فاكر الإسلام حلو بس ماعجبنيش
فده لازم يقتل على جريمته الشنيعة دي
وفيه مسيحيين كتير دخلوا الإسلام أصلا عشان ده عايز يتجوز واحدة مسلمة ياعيني، وده
مش طايق مراته المسيحية وعايز يطلقها بس ماعندوش في دينه طلاق
دول لازم يعرفوا إن الإسلام ده مش لعبة
وأكرر: أنا كحاكم للدولة الإسلامية مطالب أمام الله إني أحافظ على رعيتي (اللى أن
مسئول عنها) من إن حد جاهل أو منافق يفتنهم في دينهم
أرجو إن الموضوع يكون واضح
ومش عايزين حد يقعد يمسك في أدلة ظنية الدلالة، أو يستدل بأدلة في غير موضعها
ويسيب الأدلة الواضحة قطعية الدلالة
قال رسول الله صلى الله عليه وسلم: “من بدل دينه فاقتلوه”ـ
رواه البخاري 3017 و6922
والسلام عليكم
السلام عليكم
حملة توعية
حملة لا للتحرش لا للمعاكسات
حملة عيب يا ولد
الحملة العقيمة
لا للتحرش، لا للمعاكسات
ممنوع الاقتراب أو التصوير
اتفرج وانت ساكت
اوعى تفتح بقك أو تمد إيدك
ريح نفسك كده واسترخى واحنا هنجيب لك اللى تقول لك: هَيْتَ لَك
بس ماتنساش
اوعى تفتح بقك أو تمد إيدك
عيب يا ولد
عيب ولد ذئب بشرى قليل الأدب
أكيد أكيد انت اللى غلطان لوحدك
ايه ده انت عندك شهوة ولا ايه؟؟؟
اتفرج وانت ساكت
أيوة كده خليك ولد مؤدب ومحترم كده في سبيل الوطن والأخلاق الحميدة
وهنأخر لك الزواج لحد ما يبقى السن الطبيعى للزواج 50 سنة
ولما يبقى عندك 50 سنة مش هتعرف تجيب شقة تتجوز فيها
وهنخلي البنات تنسى تلبس، ولو واحدة محجبة مش هتبقى محجبة، هتبقى متبرجة بس تبرج
إسلامي
وهنعذبك
وهنطحنك
وكله في سبيل الوطن والأخلاق الحميدة
معا لمستقبل باهر
معا لحياة بلا شهوة وبلا رجولة
مش عايزينك تقدر تفرق بين فلانة بتاعت الفيديو كليب وبين عم عوض بتاع الروبابيكيا
ولو حسيت مثلا مثلا يعنى إن عندك شهوة ولا حاجة زى اللى بيقولوا عليهم رجالة دول
ابقى ركب سويتش
تشوف واحدة من اياهم تقفل السويتش
تبقى في بيتك تفتح السويتش
معا لحياة الكترونية
وسلم لى على المواطنة
والسلام عليكم
السلام عليكم
.jpg)
هناك شيء سؤال عجيب
سؤال قد يحير بعض الناس
وربما تجد أناس لا يبالون بهذا الموضوع أصلا
نحن هنا في مصر، ماهى هويتنا؟؟؟
انتماؤنا لأي شيء؟؟؟
لمزيد من التوضيح: ماذا تريدنا وسائل الإعلام في مصر أن نكون؟؟؟
هل هويتنا
فرعونية
قبطية
إسلامية
قومية عربية
غربية أمريكية
ليبرالية
علمانية
؟
أم نحن شعب بلا هوية؟؟؟
وتوصلت أخيرا إلى أنهم يغرسون فينا
” الهوية المصرية “
بحلوها ومرها
ببارها وفاجرها
بما يرضى الله فيها وما لا يرضيه
يريدوننا أن ننتمي إلى رمسيس الثاني وتحتمس الثالث لأنهما مصريان
وفي ذات الوقت ننتمي إلى سيدنا موسى لأنه عاش في مصر
يريدوننا أن ننتمي إلى مرقص لأنه نشر النصرانية بمصر
وفي ذات الوقت ننتمي إلى سيدنا عمرو بن العاص لأنه فتح مصر
يريدوننا أن ننتمي إلى محمد علي وسعد زغلول وطه حسين وجمال عبد الناصر لأنهم مصريون
وفي ذات الوقت ننتمي صلاح الدين وقطز لأنهما عاشا بمصر
يريدوننا أن نعظم كل ماهو مصري فحسب
فنحن حضارت السبعة آلاف سنة
ونحن مهد الأديان السماوية
ولدينا تراث فرعوني ويوناني وروماني ونصراني وإسلامي وشعبي
ونسعى إلى التقدم والتتطلع إلى ما وصل إليه الغرب بحلوه ومره
فنحن شعب ذو هوية مشوهة معكرة غير واضحة المعالم
لا نعلم إلى ماذا ننتمى ولا ماهية هويتنا
بل نفخر بكل ما هو مصري وندافع عنه ونتعصب له
لكن عفوا
صحيح أني مصري
لكني أولا مسلم
انتمائي الأول للإسلام
لا لأي من هذه الانتماءات السابقة
لا أنتمي إلى أي شيء يخالف انتمائي لديني وإن كان مصريا
لو لم أكن مسلما لسعيت أن أكون مسلما
والسلام عليكم
السلام عليكم
أوقات كتير بافكر فى سواق التاكسى
بافكر فيه كتير
بقول هو ازاى عنده المقدرة انه يتخانق على طول كده يمكن مع نص الزباين اللى بيركبوا معاه فى اليوم
انا جت لى فترة بقيت باعمل حسابى انى لازم اتخانق مع السواق كل ما أركب تاكسي
تلاقى الواحد منهم هادى وظريف وممكن يتكلم ويهزر طول الطريق
لكن ساعة الدفع تلاقيه شخصية تانية تماما
طب ماهو فيه ناس ممكن تكون بتدفع له قليل، لكن فى نفس الوقت فيه ناس بتدفع كتير ومش بيهمها الفلوس قوى
يعنى سواق التاكسى ممكن ياخد من فندق شيراتون المطار لحد المطار فى 10 دقايق وياخد حوالى 15 او 20 جنيه يمكن فيما أظن
وممكن ياخد صلاح سالم كله من اوله لاخره فى نص ساعة او ساعة الا ربع وياخد 7 جنيه مثلا
طب ماهى دى بتشيل دى
اتمنيت انى ابقى سواق تاكسى عشان ابقى مثال للسواق اللى مش بيتخانق ابدا مع اى حد
بعد كده أبتدى افكر فى الموضوع من ناحية تانية
فأقول طب ما هو غلبان برضه
كل حاجة بتغلى من حواليه، حتى البنزين غلى
وطبعا اختراع العداد ده انقرض خلاص
ولسه فيه ناس ممكن تبقى عايشة سنين بتروح نفس المشوار بالتاكسى بنفس الاجرة اللى كانت بتدفعها من زمان
وتخيل انت كده لو سواق تاكسى ومشيت مشوار قد كده ولاقيت الزبون راح راميلك 2 جنيه، واخبط دماغك فى الحيط بقى، هو كده حطك أمام الأمر الواقع
هتعمل ايه ساعتها؟؟؟
طب ايه الحل؟؟؟
قعدت افكر فى حل ما يظلموش عشان مااتحاسبش قدام ربنا يوم القيامة عشان ظلمت سواق تاكسى
الخوف انى الاقي يومها بينى وبين الجنة طابور تاكسجية عايزين حقهم، ده نص جنيه وده جنيه وده 5 جنيه
وفى نفس الوقت مش عايز ابقى اهبل ويتضحك عليّ
ولاقيت الحمد لله حل مثالى سهل وبسيط ومش غريب، انا ما جبتش التايهة يعنى، بس هى الناس بتكسل تطبق الحل ده
انى اتفق مع التاكسى قبل ما اركب
اصل دى أجرة، زى التجارة بالضبط والله أعلم، يعنى حسب الاتفاق
احنا بنتفق على انه يوصلني مشوار معين في مقابل مبلغ معين
يعنى هو لو رضى يوصلنى مشوار كبير بربع جنيه يبقى مافيش مشكلة
ولو أنا هادفع له على مشوار بسيط 1000 جنيه وانا راضى برضه مش مشكلة
أهم حاجة الاتفاق
عشان ولا اظلمه ولا هو يظلمنى
بس مع ذلك الظاهر ان بعض السواقين الخناق ده بيجرى فى دمهم
حتى لو جيت اتفق معاه على سعر قبل ما اركب وماعجبوش، الاقيه يزعق ويقول: ايه؟ كام؟ ليييييييييييييه؟
طب ما احنا لسه بنتفق، متضايق ليه
سبحان الله
! ! ! والسلام عليكم
السلام عليكم
كان عندي سؤال محيريني قليلا
أنا أعرف واحد معاه الإبتدائية وساب التعليم من اولى اعدادى عشان يشتغل
وطبعا نظرا للتعليم ذي المستوى المتدني عندنا فهو مش بيعرف يقرأ ولا يكتب، وناس
كتير زيه كده
المهم هو سمع محاضرة للدكتور زغلول النجار كان بيتكلم فيها عن الجينات الوراثية
والخلايا
وسمع الدكتور زغلول بيشرح بأسلوب مبسط الخلايا وأسباب الأمراض المتعلقة بها وهكذا،
أنا ماسمعتش المحاضرة دي بنفسي
فجا لي بعدها وهو متحمس وبيقول لي: أنا قررت إن شاء الله إني أعمل اختراع يكشف على
جسم الإنسان كله ويشوف الخلايا اللي فيها مرض يقوم معالجها، ولازم الجهاز يبقى فيه
عازل للأشعة عشان الإنسان مايتضرش منها
وقعد يشرح لي فكرة إختراعه، وطبعا كان شرح سطحي يفتقر إلى مادة علمية دقيقة، لكن هو
أمله إنه يبحث ويدور ويجمع معلومات عن كيفية صناعة الاختراع ده
واحد تاني في ثانوية عامة قال لي: أنا عندي مشروع ماحصلش، مشروع كده، عايز أبقى
أعمله لما أخش هندسة إن شاء الله، بس المشروع ده عايز ناس كتير تشتغل فيه
ايه بقى المشروع؟ مشروع عربية . . . بتوع عمارة يصمموا شكلها، وبتوع ميكانيكا
يصمموا الميكانيكا بتاعتها، وبتوع كهربا يصمموا الكهربا بتاعتها
ها إيه رأيك في المشروع ده؟؟؟
الحقيقة أنا ماقدرتش أجاوب
بس سؤالي بقى، هل الناس دي طموحة فعلا؟
هل هو ده الطموح المطلوب عشان الواحد يقدر يعمل حاجة؟
ممكن واحد يقعد يقول: يعنى ماهو ماكانش حد يتخيل ان الانسان يطلع القمر واهه طلع
والكلام اللى حفظناه ده
ولا الناس دي ماعندهاش خبرة علمية ولا عملية ولو عاشوا الواقع هيصدموا ويصابوا
بإحباط رهيب؟
هل أنا اللى متشائم وفكري ضئيل؟
ولا الناس دي هي اللي هتقدر تبقى حاجة في المستقبل إن شاء الله؟
والسلام عليكم
 | رياضة مصرية on Egypt مصر |
 | عمر on الشيعة |
 | osamasherif on سواق التاكسي |
 | ريهام on سواق التاكسي |
 | اسلام on وقد قيل |
